ÌìÃÀÓ°Ôº

Rhaid i blatiau rhif (a elwir hefyd yn blatiau trwyddedu) ddangos eich rhif cofrestru yn gywir. Ni allwch aildrefnu llythrennau neu rifau, na’u newid fel eu bod yn anodd eu darllen.

Cyflwynwyd y fformat rhif cofrestru cerbyd presennol yn 2001. Mae’n cynnwys:

• 2 lythyren (mae’r rhain yn cyfeirio at y rhanbarth yn y wlad lle cafodd eich cerbyd ei gofrestru gyntaf)

• 2 rif (mae’r rhain yn dweud wrthych pryd y’i cyhoeddwyd)

• 3 llythyren wedi’u dewis ar hap

Gallwch hefyd gael rhifau cofrestru personol.

Rhaid i’r platiau rhif ar eich cerbyd:

• gael eu gwneud o ddeunydd adlewyrchol

• arddangos nodau du ar gefndir gwyn (plât blaen)

• arddangos nodau du ar gefndir melyn (plât cefn)

• heb gael batrwm cefndir

• cael eu marcio i ddangos pwy gyflenwodd y platiau rhif

• cael eu marcio â rhif Safonol Prydeinig - dyma ‘BS AU 145e’ ar gyfer platiau a osodwyd ar ôl 1 Medi 2021

Ni ddylai’r nodau fod yn symudadwy nac yn adlewyrchol. Os cafodd eich platiau rhif eu gosod ar ôl 1 Medi 2021, rhaid iddynt hefyd fod yn un arlliw o ddu.

Gall eich platiau rhif hefyd:

• gael nodau 3D (wedi’u codi)

• arddangos baneri, symbolau a dynodwyr penodol

• arddangos fflach werdd, os oes gennych gerbyd allyriadau sero

Os ydych yn reidio beic modur neu feic modur tair olwyn

Rhaid i feiciau modur a beiciau modur tair olwyn a gofrestrwyd ar neu ar ôl 1 Medi 2001 arddangos plât rhif ar gefn y cerbyd yn unig.

Os ydych yn reidio beic modur neu feic modur tair olwyn a gofrestrwyd cyn 1 Medi 2001 gallwch hefyd arddangos plât rhif ar y blaen, ond nid oes rhaid ichi wneud hynny.

Dylai rhifau platiau rhif beiciau modur a beiciau modur tair olwyn fod ar 2 linell.

Tynnu ôl-gerbyd

Rhaid i’ch ôl-gerbyd arddangos yr un plât rhif â’r cerbyd rydych yn ei dynnu ag ef. Os ydych yn tynnu mwy nag un ôl-gerbyd, rhaid gosod y plât rhif ar yr ôl-gerbyd yn y cefn.

Mynd ag ôl-gerbydau masnachol neu drwm dramor

Os yw eich ôl-gerbyd angen cael ei gofrestru i fynd dramor, mae angen ichi osod y plât cofrestru ôl-gerbyd ar y cefn, yn ogystal â phlât rhif y cerbyd sy’n tynnu.

Gosodwch blât cofrestru’r ôl-gerbyd mor bell â phosibl oddi wrth plât rhif y cerbyd sy’n tynnu.

Os na allwch osod plât cofrestru’r ôl-gerbyd ar gefn eich ôl-gerbyd, gosodwch ef ar y ddwy ochr yn lle hynny. Gwnewch yn siŵr eu bod i’w gweld yn glir.

Bylchau rhwng llythrennau, a’u maint a’u harddull

Mae angen i’r nodau ar blât rhif fod o uchder a maint penodol.

Darllenwch daflen INF104W: rhifau cofrestru cerbyd a phlatiau rhif - mesur uchder a maint, am ragor o wybodaeth.

Os oes gennych ôl-gerbyd, darllenwch daflen INF291W: rhifau cofrestru ôl-gerbydau a phlatiau rhif.

Efallai y bydd angen ichi drefnu i blât rhif gael ei wneud os, er enghraifft:

• yw’ch plât rhif wedi’i golli, ei ddifrodi neu ei ddwyn

• rydych yn mewnforio car i’r DU

• rydych wedi prynu rhif cofrestru personol

Dim ond gan gyflenwr platiau rhif cofrestredig y gallwch gael plât rhif i’w wneud.

Bydd angen i’r cyflenwr weld dogfennau gwreiddiol sy’n:

• profi’ch enw a’ch cyfeiriad

• dangos eich bod yn cael defnyddio’r rhif cofrestru

Dogfennau adnabod

Gallwch ddefnyddio’r canlynol i gadarnhau’ch enw a’ch cyfeiriad:

• trwydded yrru

• bil cyfleustodau, Treth Gyngor neu ardrethi o’r 6 mis diwethaf

• cyfriflen banc neu gymdeithas adeiladu o’r 6 mis diwethaf

• cerdyn adnabod cenedlaethol

Bydd y canlynol yn cadarnhau’ch enw yn unig:

• pasbort - nid oes rhaid iddo gael ei gyhoeddi yn y DU

• cerdyn debyd neu gredyd banc neu gymdeithas adeiladu

• cerdyn gwarant yr heddlu

• cerdyn adnabod y lluoedd arfog

Profi y gallwch ddefnyddio’r rhif cofrestru

Rhaid ichi ddod ag un o’r canlynol i ddangos bod gennych hawl i arddangos y rhif cofrestru:

• tystysgrif gofrestru cerbyd (V5CW neu V5CNI)

• slip ‘ceidwad newydd’ gwyrdd o’r V5CW neu V5CNI

• tystysgrif hawl (V750W neu V750NI) i’r rhif

• dogfen gadw (V778W)

• nodyn atgoffa adnewyddu treth cerbyd neu HOS (V11W neu V11NI)

• tystysgrif gofrestru dros dro (V379 neu V379NI)

• tystysgrif awdurdodi platiau rhif (V948W) gyda stamp swyddogol gan yr Asiantaeth Trwyddedu Gyrwyr a Cherbydau (DVLA)

• tystysgrif awdurdodi platiau rhif electronig (eV948W neu eV948/2W)

• llythyr awdurdodi gan weithredwr fflyd (gan gynnwys cwmni prydlesu neu logi) yn dyfynnu’r cyfeirnod dogfen o’r dystysgrif gofrestru

• os yw eich fflyd yn y cynllun ar-alw V5CW newydd (a elwir hefyd yn ‘ataliad V5CW’), PDF o fanylion y cerbyd o’r gwasanaeth gweld cofnod cerbyd          
• tystysgrif gofrestru ôl-gerbyd y DU (VTRC)

Gallwch arddangos un o’r baneri canlynol gyda llythrennau adnabod ar ochr chwith y plât rhif:

• baner yr Undeb (a elwir hefyd yn Jac yr Undeb)

• Croes San Siôr

• Croes Sant Andreas - a elwir hefyd y Saltire

• Draig Goch Cymru

Y llythrennau, neu’r dynodwyr cenedlaethol, y gallwch eu cael yw:

• UNITED KINGDOM, United Kingdom neu UK

• GREAT BRITAIN, Great Britain neu GB

• CYMRU, Cymru, CYM neu Cym

• ENGLAND, England, ENG, Eng

• SCOTLAND, Scotland, SCO neu Sco

• WALES neu Wales

Rhaid i’r faner fod uwchben y dynodwr. Ni allwch gael y faner na’r llythrennau ar ymyl y plât rhif, ac ni all y naill na’r llall fod yn fwy na 50 milimetr o led.

Sticeri ar gyfer gyrru y tu allan i’r DU

Efallai y bydd angen ichi arddangos sticer DU hirgrwn gwyn ar gefn eich cerbyd wrth yrru y tu allan i’r DU. Mae hyn yn dibynnu ar eich plât rhif a ble rydych yn mynd.

Nid oes angen sticer DU arnoch os oes gan eich plât rhif y dynodwr DU gyda baner yr Undeb (a elwir hefyd yn Jac yr Undeb).

Rhaid ichi arddangos sticer DU os oes gan eich plât rhif unrhyw un o’r rhain:

• rhifau a llythrennau yn unig, dim baner na dynodwr

• dynodwr GB gyda baner yr Undeb

• baner yr Undeb Ewropeaidd

• baner genedlaethol Cymru, Lloegr neu’r Alban

Mae sticeri DU wedi disodli’r hen sticeri GB hirgrwn gwyn. Os oes gennych sticer GB, gorchuddiwch neu tynnwch ef cyn gyrru y tu allan i’r DU.

Peidiwch â rhoi’r sticer ar eich plât rhif.

Gyrru yn Sbaen, Cyprus a Malta

Rhaid ichi arddangos sticer y DU i yrru yn Sbaen, Cyprus a Malta, ni waeth beth sydd ar eich plât rhif.

Gyrru yng Ngweriniaeth Iwerddon

Nid oes angen sticer DU arnoch i yrru yn Iwerddon waeth beth sydd ar eich plât rhif.